Agenda item

Bu'r Pwyllgor yn ystyried adroddiad yr oedd wedi gofyn amdano yn ymwneud â'r pwysau presennol ar ofal cartref, a'r effaith yr oedd hyn yn ei chael ar ryddhau cleifion o ysbytai.  Bwriad yr adroddiad oedd rhoi sicrwydd bod cleifion yn cael cefnogaeth ddiogel i adael yr ysbyty ac roedd yn amlinellu'r pwysau a sut roedd Cyngor Sir Caerfyrddin yn ymateb i'r pwysau hynny.

Roedd y canlynol ymhlith y cwestiynau/sylwadau a godwyd ynghylch yr adroddiad:-

·         Mewn ymateb i gwestiwn ynghylch sut roedd yr Awdurdod yn cynyddu hyblygrwydd contractau a sut y byddai hyn yn effeithio ar gysondeb y ddarpariaeth o ran gofal, dywedodd y Cyfarwyddwr Gwasanaethau Cymunedol fod hyn yn cael effaith ar gysondeb y gofal a hefyd ar y gallu i ddarparu gofal ar yr adeg orau o ran pryd roedd angen ac eisiau'r gofal ar bobl. Dywedwyd wrth y Pwyllgor fod yr adroddiad yn nodi'r hyn yr oedd yr Awdurdod yn ei wneud i liniaru materion cyflenwi a sicrhawyd y Pwyllgor fod yr Awdurdod yn sicrhau nad oedd y gofal a ddarparwyd yn effeithio ar ddiogelwch.   Dywedwyd bod sefyllfa gyffredinol ynghylch hyblygrwydd y gofal a bod sgyrsiau anodd yn gorfod digwydd gyda theuluoedd ac unigolion ynghylch pa opsiynau ymarferol o ofal oedd ar gael.  Mewn rhai achosion, byddai'n rhaid cyfaddawdu ynghylch y pecyn gofal delfrydol ond byddai hyn dal yn well nag aros yn yr ysbyty.  Nodwyd bod tua 50 o unigolion mewn gofal preswyl dros dro ar hyn o bryd, y dylai'r mwyafrif ohonynt gael cymorth gartref.  Cafodd y sefyllfa ei disgrifio fel un deinamig a bod gwelliannau sylweddol wedi'u gwneud dros yr wythnosau diwethaf, ond roedd y sefyllfa'n parhau i fod yn anodd.  Dywedwyd bod yr Awdurdod yn ceisio cynnig contractau mwy hyblyg yn hytrach na'r rotâu anhyblyg traddodiadol i gynorthwyo gyda recriwtio a chadw staff.

·         Mynegwyd pryder y byddai'r cytundebau hyblyg yn arwain at ddiffyg parhad yn y gofal gydag unigolion yn cael nifer o wahanol ofalwyr.  Dywedwyd er bod nifer o bobl o bosibl yn darparu gofal gwnaed pob ymdrech i sicrhau bod hyn yn cael ei gadw i'r un gr?p o bobl.  Cydnabuwyd bod y parhad hwn o fudd i'r unigolyn oedd yn derbyn y gofal ac i'r gofalwr.

·         Hefyd gofynnwyd am eglurhad ynghylch y defnydd o feicrofentrau Dywedwyd wrth y Pwyllgor fod y cynllun eisoes yn cael ei ddefnyddio yn Sir Benfro a'i bod yn ddyddiau cynnar iawn i Sir Gaerfyrddin. Megis dechrau oedd y cynllun gyda’r nod o gynorthwyo ardaloedd lle'r oedd yn anodd cael gofal cartref yn draddodiadol. Dywedwyd bod yr Awdurdod wrthi'n recriwtio aelod o staff i arwain ar y fenter.

·         Gofynnwyd a oedd pwysau ar yr Awdurdod i flaenoriaethu rhyddhau cleifion mewn ysbytai dros y rhai oedd eisoes yn aros am becynnau gofal.  Dywedwyd wrth y Pwyllgor fod pwysau cyson o ran cydbwyso rhyddhau cleifion o ysbytai a rhestrau aros cymunedol a’i fod yn anochel y byddai'r rhai yn y gymuned yn aros yn hirach oherwydd yr angen i flaenoriaethu rhyddhau cleifion o ysbytai.  Er gwaethaf y capasiti cyfyngedig, roedd pobl a oedd yn byw gartref ac yn aros i’r gwasanaethau gofal cartref ddechrau yn cael eu rheoli, gyda'r rhai a oedd yn y categori coch yn cael blaenoriaeth ar unwaith.

·         Mewn ymateb i gwestiwn ynghylch pa gymorth ymarferol fyddai'n cael ei gynnig i aelodau'r teulu a oedd yn camu i'r adwy i ddarparu gofal a sut y byddai ansawdd y gofal a ddarperir ganddynt yn cael ei fonitro, dywedwyd y byddai aelodau'r teulu yn derbyn hyfforddiant priodol ac asesiad codi a chario.

·         Cyfeiriwyd at ddatblygu'r Academi Gofal ac os byddai'r cyfyngiadau cyllidebol yn effeithio ar ei sefydlu.  Dywedwyd bod academi gofal a lansiwyd gan yr awdurdod yn targedu disgyblion chweched dosbarth gyda'r gobaith o ennill cymhwyster lefel gradd.  Dywedwyd bod cyfres o unigolion o safon uchel gyda'r gwytnwch, yr hyder, a'r wybodaeth ofynnol i fynd ar y trywydd tuag at hyfforddiant proffesiynol gobeithio.  Cydnabuwyd bod sefydlu'r academi yn cymryd amser ac nad oedd cyfyngiadau cyllidebol yn effeithio ar yr academi.

·         Gofynnwyd a oedd yr Awdurdod yn mynd i gynyddu nifer y gwelyau cam i lawr yn y Sir.  Dywedwyd bod y Bwrdd Iechyd wedi comisiynu 15 o welyau ychwanegol ar sail tymor byr a bod 14 o welyau gan yr Awdurdod yng nghartref gofal Llys y Bryn (T? Pili Pala). Roedd ysbytai cymunedol yn cael eu defnyddio hefyd gyda 28 gwely yn Nyffryn Aman a 14 gwely yn ysbyty Llanymddyfri.  Cydnabuwyd bod angen capasiti ychwanegol yn y gymuned ac fel model roedd yn gweithio'n dda gyda gwell canlyniadau i unigolion.  Cytunwyd bod angen lledaeniad daearyddol, fodd bynnag roedd hyn yn gyfyngedig i'r capasiti mewn cartrefi gofal.

·         Gofynnodd y Pwyllgor am ddiweddariadau rheolaidd yngl?n â gofal cartref a chynnydd gyda'r Bwrdd Iechyd.  Cytunwyd y byddai diweddariadau'n cael eu cynnwys yn awtomatig mewn adroddiadau perfformiad a monitro data. 

PENDERFYNWYD YN UNFRYDOL dderbyn yr adroddiad.