Agenda a Chofnodion

Cafwyd ymddiheuriad am absenoldeb gan y Cynghorydd A.W. Jones.

Ni chafwyd dim datganiadau o fuddiant personol.

Ni chafwyd dim datganiadau ynghylch chwip waharddedig.

Ni chafwyd dim datganiadau ynghylch chwip waharddedig.

Bu'r Pwyllgor yn ystyried adroddiad oedd yn rhoi golwg gyffredinol ar sut yr oedd pob swyddogaeth graffu'n perfformio mewn perthynas â'r camau gweithredu a'r mesurau yng Nghynllun Gwella 2016/17 yr Awdurdod, fel yr oedd ar 30^ain Mehefin 2016. 

Cytunodd y Rheolwr Dros Dro Datblygu Economaidd, mewn ymateb i ymholiad, i geisio eglurhad ynghylch pam nad oedd ffigyrau dadansoddi y Pwyllgor Craffu Addysg a Gwasanaethau Plant yn creu cyfanswm perffaith.

PENDERFYNWYD nodi'r adroddiad.

Bu'r Pwyllgor yn ystyried adroddiad Monitro Perfformiad Adrannol Cynllun Gwella 2016/17 a oedd yn rhoi golwg gyffredinol ar berfformiad Adran y Prif Weithredwr a'r Gwasanaethau Corfforaethol yn Chwarter 1 [1^af Ebrill - 30^ain Mehefin] 2016/17.

Codwyd y materion canlynol wrth ystyried yr adroddiad:

·        Mewn ymateb i ymholiad ynghylch yr oedi sylweddol wrth ymateb i geisiadau o dan y Ddeddf Rhyddid Gwybodaeth eglurodd y Rheolwr Datblygu Economaidd wrth y Pwyllgor fod llawer o'r ceisiadau'n gymhleth, ac yn aml yn gofyn am ddata o nifer fawr o agweddau ar yr Awdurdod ac o nifer o flynyddoedd blaenorol. Ychwanegodd y byddai'r targed yn cael ei adolygu yng ngoleuni nifer y ceisiadau sy'n dod i law;

·        Cytunodd Pennaeth y Gwasanaethau Ariannol, mewn ymateb i ymholiad, i roi manylion i'r Aelodau am gynigion presennol Llywodraeth Cymru yn sgil tynnu Cynllun Rhyddhad (Ardrethi) Manwerthu Cymru yn ei ôl; 

·        Gofynnwyd am sicrwydd na fyddai'r dull ar y cyd gan adeiniau'r Gwasanaethau Stryd a'r Gwasanaethau Adeiladau ar gyfer cael cerbydau gwagio cwteri a charthffosiaeth yn cael effaith ar y gwasanaeth y mae'r fath gerbyd yn ei ddarparu. Dywedodd y Pennaeth Archwilio, Risg a Chaffael, mai dim ond un agwedd oedd hwn ar sut mae'r adeiniau uchod yn cydweithio i wella'r darpariaethau presennol a chyflawni arbedion effeithlonrwydd ond y byddai'n gofyn am y sicrwydd hwnnw gan y gwasanaeth dan sylw;

·        Cytunodd swyddogion i gael gwybod gan yr Is-adran Gwasanaethau Etholiadol i ba raddau oedd peidio â chofrestru i bleidleisio yn broblem yn Sir Gaerfyrddin;  

·        Mewn ymateb i ymholiad yn deillio o 'Gam Gweithredu 12007' dywedodd Pennaeth Gweinyddiaeth a'r Gyfraith y byddai Gweithgor Adolygu'r Cyfansoddiad yn cwrdd yn fuan i adolygu'r newidiadau yr oedd wedi eu hargymell ers iddo gael ei sefydlu ac ystyried a oedd angen unrhyw welliannau. Yn ogystal cytunwyd i gyflwyno sylw i Weithgor Adolygu'r Cyfansoddiad y dylai'r cyfeiriad at sicrhau bod y Cyngor yn fwy agored a thryloyw gynnwys 'cynhwysiad' hefyd;

·        Dywedodd Pennaeth Dros Dro y Gwasanaethau TGCh fod ei wasanaeth wedi ymgysylltu â Chyfarwyddwyr, Penaethiaid Gwasanaeth a staff i ganfod sut y gallai TGCh ddiwallu anghenion eu gwasanaeth orau. Hefyd, dywedwyd wrth yr Aelodau y byddai Strategaeth Trawsnewid Digidol newydd yn cael ei datblygu dros y 6 mis nesaf ynghyd ag ymgysylltu'n helaeth ymhellach â phob maes gwasanaeth, aelodau etholedig a phartneriaid ac y byddai'r strategaeth yn cyd-fynd â'r Strategaeth Gorfforaethol i sicrhau gweithlu symudol mwy ystwyth;

·        Dywedodd y Prif Weithredwr Cynorthwyol (Rheoli Pobl a Pherfformiad) wrth y Pwyllgor nad oedd y trefniant gweithio ar y cyd arfaethedig â Chyngor Sir Penfro ynghylch materion TGCh yn symud yn ei flaen ar hyn o bryd a bod Cyngor Sir Penfro wedi penodi ei Bennaeth TGCh ei hun.  Fodd bynnag, roedd Cyngor Sir Caerfyrddin yn dal i fod yn bartner sy'n barod i gydweithio. 

PENDERFYNWYD nodi'r adroddiad.

Bu'r Pwyllgor yn ystyried y Strategaeth ddrafft i hyrwyddo'r Gymraeg yr oedd yn ofynnol i'r Cyngor ei chyhoeddi fel rhan o Safonau'r Gymraeg.  Roedd y Strategaeth, a oedd wedi cael ei datblygu ar y cyd â Fforwm Strategol yr Iaith Gymraeg yn y Sir, yn gyfle i'r Awdurdod weithio a rhannu arferion gorau gyda sefydliadau eraill ledled y sir drwy Fforwm Strategol yr Iaith Gymraeg.

Codwyd y materion canlynol wrth ystyried y Strategaeth ddrafft:

·       Hysbyswyd yr Aelodau fod yr Awdurdod eisoes yn cydweithio ag awdurdodau lleol cyfagos ynghylch agweddau ar y strategaeth;

·       Awgrymwyd, ar wahân i'r Strategaeth uchod a oedd yn ymwneud â'r Gymraeg, y dylid ystyried y posibilrwydd o gyflwyno strategaeth ar wahân a fyddai'n annog pobl oedd wedi gadael Cymru i ddychwelyd.  Cytunodd y Swyddog Polisi a Phartneriaeth y byddai strategaeth o'r fath yn cael croeso ond bod angen rhagor o ymchwil i'r rhesymau pam y mae pobl wedi symud i ffwrdd yn y lle cyntaf ac y byddai hyn yn flaenoriaeth yn ystod y 18 mis cyntaf ar ôl mabwysiadu'r Strategaeth;

·       Mynegwyd pryder bod y Strategaeth wedi'i chyfeirio'n benodol at y sector cyhoeddus yn hytrach na'r sector preifat.  Mewn ymateb, dywedodd y Swyddog Polisi a Phartneriaeth fod llawer o fusnesau yn Sir Gaerfyrddin yn gweithredu'n ddwyieithog a bod pwyslais mawr ar weithio mewn partneriaeth.

PENDERFYNWYD cymeradwyo'r fersiwn drafft o'r Strategaeth.

Bu'r Pwyllgor yn ystyried yr adroddiad monitro a amlinellai'r sefyllfa gyllidebol ynghylch blwyddyn ariannol 2016/17 fel yr oedd ar 30^ain Mehefin 2016. Roedd yr adroddiad  yn cynnwys:

·     Adroddiad Monitro Cyllideb Gorfforaethol yr Awdurdod (Atodiad A);

·     Cyllideb Refeniw Adran y Prif Weithredwr a'r Gwasanaethau Corfforaethol (Atodiad B);

·     Monitro Rhaglen Gyfalaf Gorfforaethol 2016/17 (Atodiad C);

·     Monitro Rhaglen Gyfalaf Gorfforaethol 2016/17 - y prif amrywiannau a

·     Rhaglen Gyfalaf Adran y Prif Weithredwr a'r Adran Adnoddau 2015/16 (Atodiad D).

Codwyd y materion canlynol wrth ystyried yr adroddiad:

·       Mewn ymateb i ymholiad dywedwyd wrth y Pwyllgor fod yr arbedion aros galwad wedi eu nodi yn dilyn adolygiad gan y tîm TIC [Trawsnewid i Wneud Cynnydd] a oedd wedi canfod bod rhai gweithwyr wedi bod yn derbyn taliadau aros galwad yn unol â'u dyletswyddau ers nifer o flynyddoedd ond nad oeddent byth wedi cael galwad i fynd allan;

·       Cyfeiriwyd at y costau oedd yn gysylltiedig â phecynnau gwell o ran dileu swydd yn wirfoddol mewn ysgolion yr oedd yn rhaid i'r Cyngor dalu amdanynt a nodwyd bod y dewisiadau yn ymwneud â rheoli'r costau a'r posibilrwydd o rannu rhywfaint o'r gost ag ysgolion yn cael eu hystyried;

·       Mynegwyd pryder bod rhywfaint o'r tanwariant o £632,000 mewn perthynas â chartrefi gofal ychwanegol wedi cael ei ddefnyddio i brynu'r Neuadd Sirol, Caerfyrddin yn hytrach na'i wario ar ofal cymdeithasol. Cadarnhaodd Pennaeth y Gwasanaethau Ariannol fod £225,000 o'r swm hwn wedi cael ei drosglwyddo i'r diben hwnnw yn dilyn penderfyniad y Bwrdd Gweithredol i brynu'r adeilad.

PENDERFYNWYD YN UNFRYDOL gymeradwyo'r adroddiad.

Bu'r Pwyllgor yn ystyried yr Adroddiad Chwarterol ynghylch y Dangosyddion Darbodaeth a Rheoli'r Trysorlys am y cyfnod 1^af Ebrill 2016 - 30^ain Mehefin 2016 a oedd yn nodi gweithgareddau rheoli'r trysorlys a ddigwyddodd yn ystod chwarter cyntaf y flwyddyn yn unol â Pholisi a Strategaeth Rheoli'r Trysorlys 2016-17 a fabwysiadwyd gan y Cyngor ar 23^ain Chwefror 2016.

PENDERFYNWYD cymeradwyo'r adroddiad.

Bu'r Pwyllgor yn ystyried Adroddiad Blynyddol y Pwyllgor Craffu Polisi ac Adnoddau am flwyddyn y cyngor 2015/16 a oedd yn rhoi golwg gyffredinol ar waith y Pwyllgor gan gynnwys:-

·       Golwg Gyffredinol ar y Rhaglenni Gwaith Craffu

·       Y materion allweddol a ystyriwyd

·       Materion oedd wedi'u cyfeirio at y Bwrdd Gweithredol neu Bwyllgorau Craffu Eraill neu ganddynt

·       Presenoldeb yr Aelodau yn y cyfarfodydd

Cytunodd Pennaeth Gweinyddiaeth a'r Gyfraith, mewn ymateb i sylw, i roi manylion i'r Pwyllgor am Flaenraglen Waith y Bwrdd Gweithredol bob chwarter.

PENDERFYNWYD YN UNFRYDOL gymeradwyo'r adroddiad.

PENDERFYNWYD nodi'r rhestr o eitemau ar gyfer y dyfodol a oedd i'w hystyried yn y cyfarfod nesaf ar 11 Tachwedd, 2016.

PENDERFYNWYD llofnodi cofnodion y cyfarfod oedd wedi'i gynnal ar 9^fed Mehefin 2016 gan eu bod yn gywir.