Agenda a Chofnodion

Derbyniwyd ymddiheuriadau am absenoldeb gan y Cynghorwyr P. Cooper, S. Godfrey-Coles a G.B. Thomas.

Ni chafwyd dim datganiadau ynghylch buddiannau personol na chwip waharddedig.

Dywedodd y Cadeirydd nad oedd dim cwestiynau wedi dod i law gan y cyhoedd.

Bu'r Pwyllgor yn ystyried yr adroddiad monitro ariannol ar Gyllideb Refeniw a Chyllideb Gyfalaf 2023/24 y Gwasanaethau Diogelu'r Cyhoedd a Lle a Seilwaith ar gyfer y cyfnod hyd at 29  Chwefror 2024.  

Dywedwyd bod y gyllideb refeniw ar y cyfan yn rhagweld gorwariant cyffredinol o £1,280k ar ddiwedd y flwyddyn.  Rhagwelwyd gwariant net yn y gyllideb gyfalaf o £15,802k o gymharu â chyllideb net weithredol o £29,179k gan roi amrywiant o £-13,377k.

Rhoddwyd sylw i'r cwestiynau/materion canlynol wrth drafod yr adroddiad:

Wrth ystyried yr adroddiad, gofynnodd y Pwyllgor am i wybodaeth ychwanegol gael ei chynnwys o fewn meysydd amrywiadau gwariant sylweddol yn adroddiadau'r dyfodol i roi gwybod i'r aelodau am y sefyllfa gyllidebol ac i alluogi craffu effeithiol ar y meysydd perthnasol. Cytunwyd y byddai adborth y Pwyllgor yn cael ei drosglwyddo i'r adrannau priodol ac atgoffwyd yr aelodau y gellid gwneud ceisiadau am adroddiadau manwl fel rhan o rôl y Pwyllgor wrth nodi tueddiadau o fewn meysydd sy'n berthnasol i'w gylch gwaith.

Mewn ymateb i'r pryderon a godwyd mewn perthynas â'r cynnydd mewn gwariant ar drydan mewn safleoedd tirlenwi sydd wedi cau, darparwyd sicrwydd bod swyddogion yn edrych ar y mater hwn ar hyn o bryd, a'r bwriad oedd nodi atebion i liniaru costau wrth symud ymlaen.

Mewn ymateb i ymholiad, cadarnhaodd yr Aelod Cabinet dros Wasanaethau Trafnidiaeth, Gwastraff a Seilwaith, y bydd adroddiad yn ymwneud â thaliadau parcio'r Cyngor yn cael ei ystyried gan y Cabinet maes o law.

Mynegwyd pryderon ynghylch y gwariant sy'n gysylltiedig â thanddefnyddio cerbydau adrannol.  Rhoddodd y Rheolwr Gwella Busnes sicrwydd i'r Pwyllgor fod adolygiad ar y gweill ar hyn o bryd, gyda'r nod o gyflwyno cerbydau adrannol sy'n benodol ar gyfer gwasanaethau er mwyn gwneud y defnydd gorau posibl ohonynt.  Cytunwyd y byddai canlyniadau'r adolygiad yn cael eu rhoi i'r Pwyllgor.

Cyfeiriwyd at dangyflawniad incwm ar gyfer safleoedd trwyddedig lle nad oedd y targed yn adlewyrchu nifer y busnesau trwyddedadwy yn y sir. Eglurodd y Pennaeth Tai a Diogelu'r Cyhoedd fod y gorwariant a ragwelwyd yn seiliedig ar yr incwm wedi'i ddilysu o flwyddyn i flwyddyn, a oedd bellach angen ei adolygu yng ngoleuni'r gostyngiad yn nifer y safleoedd trwyddedadwy ar draws y Sir. Cytunwyd y byddai rhagor o wybodaeth yn hyn o beth yn cael ei dosbarthu i'r Pwyllgor dros e-bost.

Mewn ymateb i ymholiad, eglurodd yr Aelod Cabinet dros Wasanaethau Trafnidiaeth, Gwastraff a Seilwaith i'r Pwyllgor nad oedd digon o gyllid wedi dod i law gan y Llywodraeth Ganolog a Llywodraeth Cymru i gynnal priffyrdd y sir i lefel briodol.

Mewn ymateb i ymholiad ynghylch y gost o brynu tir a'r ffioedd cysylltiedig ar gyfer Llwybr Dyffryn Tywi, cyfeiriodd yr Aelod Cabinet dros Adnoddau at y broses gymhleth a hir sy'n ofynnol i sicrhau bod cynllun uchelgeisiol yr Awdurdod yn cael ei ddarparu'n briodol.  Hefyd rhoddwyd gwybod i'r Pwyllgor y byddai adolygiad yn ymwneud â Llwybr Dyffryn Tywi yn cael ei ystyried gan y Cabinet maes o law.

Eglurodd y Pennaeth Lle a Chynaliadwyedd wrth y Pwyllgor fod adolygiad arbenigol  ...  Gweld y cofnodion lawn ar gyfer eitem 4.

Cafodd y Pwyllgor adroddiad i'w ystyried ar effeithlonrwydd ynni a chynhyrchu ynni mewn perthynas â stoc adeiladau hanesyddol y sir. 

Cyflwynwyd yr adroddiad yn dilyn atgyfeiriad gan y Pwyllgor Craffu Cymunedau, Cartrefi ac Adfywio a oedd yn nodi gwerth adeiladau hanesyddol i Sir Gaerfyrddin, yr angen i gynnal adeiladau o'r fath yn briodol gyda'r deunyddiau a'r dulliau cywir o atgyweirio, a hynny er mwyn sicrhau cynaliadwyedd ar gyfer cenedlaethau'r presennol a'r dyfodol. 

Roedd yr adroddiad yn manylu ar ymrwymiad yr Awdurdod i wella effeithlonrwydd ynni ei adeiladau, gan gynnwys y rhai sydd â gwarchodaeth statudol, yn unol â fframweithiau deddfwriaethol a pholisi perthnasol, er mwyn cyrraedd ei dargedau di-garbon, lleihau tlodi tanwydd a gwella iechyd pobl.  Yn hyn o beth, cyfeiriwyd at ddatblygu canllawiau cynllunio atodol drafft ar dreftadaeth adeiledig a fyddai'n destun ymgynghoriad yn fuan, a datblygu cynlluniau ynni'r ardal leol a fyddai'n nodi'r newidiadau y mae eu hangen i ddatgarboneiddio'r system ynni leol yn Sir Gaerfyrddin ynghyd ag amcangyfrif lefel uchel o gostau.

Rhoddwyd sylw i'r cwestiynau/materion/sylwadau canlynol wrth drafod yr adroddiad:

Mewn ymateb i sylwadau a wnaed, cadarnhaodd yr Uwch-swyddog Treftadaeth Adeiledig fod 3 o'r 29 o ardaloedd cadwraeth ledled Caerfyrddin yn destun amodau 'Erthygl 4' a thrwy hynny'n dileu hawliau datblygu a ganiateir deiliaid tai. Yn unol â hynny, eglurwyd na fyddai unrhyw gyfyngiadau cynllunio ychwanegol ar osod Paneli Solar i'r 26 o ardaloedd cadwraeth eraill nad ydynt yn destun amodau 'Erthygl 4'. Pwysleisiwyd bod penderfyniadau o'r fath yn cael eu gwneud yn unol â deddfwriaeth a'u bod yn ystyried y gwerth cynhenid a roddwyd ar dreftadaeth adeiledig y sir.

Yn dilyn ymholiad ynghylch gofynion cyllido ar gyfer adfer adeiladau hanesyddol, cyfeiriodd y Pennaeth Lle a Chynaliadwyedd at Gynllun Ynni Ardal Leol drafft yr Awdurdod a oedd yn darparu'r costau ynni cyffredinol ar gyfer yr Awdurdod cyfan, ond nid oedd costau manwl ar dreftadaeth adeiledig na stoc dai hanesyddol y sir ar gael ar hyn o bryd, ond gallai fod yn faes i'w archwilio ymhellach maes o law ar ôl gweithredu'r Cynllun.

Croesawodd y Pwyllgor yr adroddiad ac roedd yr aelodau'n falch o nodi'r gefnogaeth a ddarparwyd gan yr Awdurdod i fusnesau a pherchnogion tai ledled y sir mewn perthynas ag arbed ynni a mesurau cynhyrchu ynni priodol ar gyfer adeiladau hanesyddol. Yn dilyn gwahoddiad a estynnwyd gan yr Aelod Cabinet dros Newid Hinsawdd, Datgarboneiddio a Chynaliadwyedd, cytunodd y Pwyllgor i gynnal ymweliad safle â Chanolfan Tywi a oedd yn rhan o'r tîm Lle a Chynaliadwyedd ac, fel awdurdod ledled y DU, rhoddodd gyngor, hyfforddiant ac addysg ynghylch y gofal, y gwaith atgyweirio a'r gwaith addasu priodol i adeiladau hanesyddol.

PENDERFYNWYD YN UNFRYDOL:

Ystyriodd y Pwyllgor, yn unol ag Erthygl 6.2 o Gyfansoddiad y Cyngor, ei Flaengynllun Gwaith drafft ar gyfer 2024/25. 

Mewn ymateb i ymholiad, cadarnhaodd yr Aelod Cabinet dros Newid Hinsawdd, Datgarboneiddio a Chynaliadwyedd nad oedd unrhyw wybodaeth wedi dod i law i awgrymu na fyddai'r Strategaeth Farchogaeth yn cael ei chyflwyno i'r Pwyllgor fel y nodwyd yn y Blaengynllun Gwaith.

PENDERFYNWYD YN UNFRYDOL gymeradwyo'r Blaengynllun Gwaith Lle, Cynaliadwyedd a Newid Hinsawdd ar gyfer 2024/25.  

Cafodd y Pwyllgor restr o'r eitemau a fyddai'n cael eu hystyried yn ei gyfarfod nesaf ar 16 Gorffennaf 2024.

PENDERFYNWYD YN UNFRYDOL gytuno ar y rhestr o'r eitemau i'w hystyried yng nghyfarfod nesaf y Pwyllgor ar 16 Gorffennaf 2024.

PENDERFYNWYD llofnodi cofnodion cyfarfod y Pwyllgor a gynhaliwyd ar 22 Ebrill, 2024 gan eu bod yn gywir.