Agenda a Chofnodion

Ni chafwyd datganiadau o fuddiant personol.  

PENDERFYNWYD llofnodi Cofnod Penderfyniadau'r cyfarfod a gynhaliwyd ar 23 Medi 2024, gan ei fod yn gywir. 

Cafodd yr Aelod Cabinet adroddiad i'w ystyried a oedd yn nodi diwygiadau arfaethedig i Gronfa Mentrau Gwledig Sir Gaerfyrddin (CREF).

Roedd yr Aelod Cabinet yn cydnabod effaith cynllun Cronfa Mentrau Gwledig Sir Gaerfyrddin ers ei lansio yn 2016 lle darparwyd cymorth i 25 o fusnesau gwledig gyflwyno 90,000 troedfedd sgwâr o le cyflogaeth ychwanegol neu well, gan greu 151 o swyddi, a chan arwain at fuddsoddiad o £5.5m i economi wledig Sir Gaerfyrddin.

Rhoddwyd gwybod bod tîm y prosiect wedi monitro'r cynllun ers iddo gael ei ail-lansio ym mis Awst 2023 ac wedi nodi'r rhwystrau canlynol i ymgeiswyr a oedd naill ai wedi tynnu'n ôl o'r broses neu'r rhai yr ystyrir eu bod yn anghymwys i wneud cais am gyllid:-

• Mae'r gyfradd ymyrryd yn is na'r bwlch rhwng y costau adeiladu a gwerth terfynol adeilad.

• Y cynnydd yng nghostau adeiladu a'r cyfyngiadau o ran meini prawf y gronfa-
  • Uchafswm grant £200,000
  • Ffigur o £20,000 ar gyfer pob swydd

• Roedd cyfyngiadau ffiniau'r cynllun o ran cymhwysedd yn eithrio ymgeiswyr oedd y tu allan i'r ardal gymwys ond nad oedd ganddynt unrhyw opsiwn ariannu addas arall.

Yn unol â hynny, adolygodd yr Aelod Cabinet ddiwygiadau arfaethedig i feini prawf ariannu cynllun Cronfa Mentrau Gwledig Sir Gaerfyrddin (CREF) i sicrhau bod y gronfa'n gyfredol a'i bod yn gallu darparu cymorth priodol i fusnesau Sir Gaerfyrddin. 

PENDERFYNWYD gwneud y newidiadau canlynol i Gronfa Mentrau Gwledig Sir Gaerfyrddin:

i)               Cynyddu swm y grant fesul swydd Cyfwerth ag Amser Llawn a grëwyd o £20,000 i £30,000. 

ii)             Cynyddu'r gyfradd ymyrryd o 45%-50%.

iii)           Dyfarnu cyllid yn y dyfodol o dan gynllun cymhorthdal Cymorth Ariannol Lleiaf (MFA) i alluogi cynnydd yn y gyfradd ymyrryd i 50%

iv)           Cynyddu'r uchafswm grant sydd ar gael o £200,000 i £240,000.

v)             Bydd y grant bellach ar gael i fusnesau ledled y sir.

vi)           Ailfrandio'r cynllun fel Cronfa Mentrau Sir Gaerfyrddin – CEF.