Agenda a Chofnodion

Ni chafwyd dim datganiadau o fuddiant personol.

PENDERFYNWYD llofnodi bod Cofnod Penderfyniadau'r cyfarfod oedd wedi'i gynnal ar 28 Gorffennaf, 2015 yn gofnod cywir.

Rhoddodd yr Aelod o'r Bwrdd Gweithredol ystyriaeth i'r Adroddiad Blynyddol ar yr Iaith Gymraeg 2015-16, a fanylai ar y gwaith a wnaed gan y Cyngor mewn perthynas â'r iaith Gymraeg yn ystod y cyfnod hwnnw ac a luniwyd er mwyn cydymffurfio â threfniadau monitro Comisiynydd y Gymraeg.

Mae Mesur y Gymraeg (Cymru) 2011 yn gosod dyletswydd ar Gynghorau Sir a Chynghorau Bwrdeistref Sirol yng Nghymru, Awdurdodau Parciau Cenedlaethol a Gweinidogion Cymru i gydymffurfio â'r Safonau mewn perthynas â'r Gymraeg.

Mae'r Safonau yn golygu na ddylai'r Gymraeg gael ei thrin yn llai ffafriol na'r Saesneg a rhaid iddynt hefyd hybu neu hwyluso'r defnydd o'r Gymraeg.  Mae hyn yn unol â'r ddwy egwyddor sy'n ffurfio'r sail ar gyfer gwaith Comisiynydd y Gymraeg:-

·       yng Nghymru, ni ddylai'r Gymraeg gael ei thrin yn llai ffafriol na'r Saesneg;

·       dylai pobl yng Nghymru fod yn gallu byw eu bywydau drwy gyfrwng y Gymraeg os ydynt yn dewis gwneud hynny.

Disodlodd fframwaith y Safonau gynlluniau iaith Gymraeg o 31 Mawrth, 2016 ymlaen a bydd y Safonau yn:-

·       rhoi mwy o eglurder i sefydliadau ynghylch eu dyletswyddau mewn perthynas â'r Gymraeg;

·       rhoi mwy o eglurder i siaradwyr Cymraeg ynghylch y gwasanaethau y gallant ddisgwyl eu derbyn yn y Gymraeg;

·       sicrhau mwy o gysondeb o ran gwasanaethau Cymraeg ac yn gwella eu hansawdd.

Rhoddodd Comisiynydd y Gymraeg hysbysiad cydymffurfio i Gyngor Sir Caerfyrddin ynghylch Rheoliadau Safonau'r Gymraeg ar 30 Medi, 2015, sy'n mynnu bod y Cyngor yn cydymffurfio â'r rhan fwyaf o'r Safonau erbyn 31 Mawrth, 2016.

PENDERFYNWYD, yn amodol ar gynnwys y newidiadau a nodwyd, fod yr Adroddiad Blynyddol ar yr Iaith Gymraeg 2015-16 yn cael ei gymeradwyo i'w gyflwyno i Gomisiynydd y Gymraeg.