Agenda a Chofnodion

Ni chafwyd ymddiheuriadau am absenoldeb.

Ni ddatganwyd unrhyw fuddiannau personol.

NI DDYLID CYHOEDDI’R ADRODDIAD SY’N YMWNEUD Â’R MATER CANLYNOL GAN EI FOD YN CYNNWYS GWYBODAETH EITHRIEDIG FEL Y’I DIFFINIWYD YM MHARAGRAFF 14 O RAN 4 O ATODLEN 12A I DDEDDF LLYWODRAETH LEOL 1972 FEL Y’I DIWYGIWYD GAN ORCHYMYN LLYWODRAETH LEOL (MYNEDIAD AT WYBODAETH) (AMRYWIO) (CYMRU) 2007. OS BYDD Y PWYLLGOR AR ÔL CYNNAL PRAWF LLES Y CYHOEDD YN PENDERFYNU YN UNOL Â’R DDEDDF, I YSTYRIED Y MATER HYN YN BREIFAT, GORCHMYNNIR I’R CYHOEDD ADAEL Y CYFARFOD YN YSTOD TRAFODAETH O’R FATH.

PENDERFYNWYD YN UNFRYDOL, yn unol â Deddf Llywodraeth Leol 1972, fel y'i diwygiwyd gan Orchymyn Llywodraeth Leol (Mynediad at Wybodaeth) (Amrywio) (Cymru) 2007, orchymyn i'r cyhoedd adael y cyfarfod tra oedd yr eitem ganlynol yn cael ei hystyried, gan fod yr adroddiad yn cynnwys gwybodaeth eithriedig fel y'i diffiniwyd ym Mharagraff 14 o Ran 4 o Atodlen 12A i'r Ddeddf.

Yn sgil cynnal prawf budd y cyhoedd PENDERFYNWYD, yn unol â'r Ddeddf y cyfeiriwyd ati yng nghofnod 3 uchod, beidio â chyhoeddi cynnwys yr adroddiad am ei fod yn cynnwys gwybodaeth eithriedig ynghylch materion ariannol neu faterion busnes unrhyw unigolyn penodol (gan gynnwys yr Awdurdod oedd yn meddu ar y wybodaeth honno) (Paragraff 14 o Ran 4 o Atodlen 12A i'r Ddeddf).  Roedd prawf budd y cyhoedd mewn perthynas â'r adroddiad hwn yn drech na'r budd i'r cyhoedd o ran datgelu'r wybodaeth a geir ynddo oherwydd byddai datgelu'r wybodaeth hon yn anfantais faterol i'r awdurdod mewn unrhyw drafodaethau dilynol â thrydydd partïon, a gallai cael effaith niweidiol ar y pwrs cyhoeddus.

Amlinellodd y Cadeirydd ddiben y cyfarfod sef ystyried cais gan y Cynghorwyr Rob James, Gary Jones, Deryk Cundy, Dot Jones, Andre McPherson a Kevin Madge, o dan ddarpariaethau Erthygl 6.7 o Gyfansoddiad y Cyngor i alw i mewn penderfyniad a wnaed gan y Bwrdd Gweithredol yn ei gyfarfod a gynhaliwyd ar 8 Chwefror 2021 (gweler cofnod penderfyniad 12) mewn perthynas â Thir ym Mhenprys , Llanelli, am y rhesymau canlynol: "Rydym yn ei alw i mewn gan nad ydym yn credu bod y penderfyniad yn cydymffurfio â pholisi'r cyngor ac nad yw er budd y cyhoedd".

Croesawyd y Cynghorydd Rob James i'r cyfarfod ynghyd â Jason Jones, Pennaeth Adfywio a Peter Edwards, Rheolwr Prisio.

Eglurodd Mr Jones gefndir yr adroddiad gwreiddiol gan gyfeirio'n benodol at bolisïau'r Cyngor a ystyriwyd ac yn dilyn hynny ymatebodd i gwestiynau gan aelodau.

Gwahoddwyd y Cynghorydd Rob James i ymhelaethu ar y rhesymau dros alw'r penderfyniad i mewn. Cyfeiriodd yn benodol at y canlynol:

·       Nid oedd y penderfyniad yn adlewyrchu nac yn cefnogi uchelgeisiau Deddf Llesiant Cenedlaethau'r Dyfodol ac y dylai colli tir amaethyddol at ddibenion datblygu fod yn opsiwn olaf oll pan fod safleoedd tir llwyd eraill ar gael;

·       Nid oedd y penderfyniad yn cyd-fynd ag amcanion llesiant y Cyngor gan y byddai'n cael effaith andwyol ar amwynder yr amlosgfa gyfagos;

·       Nid oedd gwaredu mannau gwyrdd ar gyfer derbyniadau cyfalaf yn cyd-fynd â chynigion y Cyngor i fynd i'r afael â newid yn yr hinsawdd a dod yn awdurdod di-garbon.

Yna, atebodd y Cynghorydd James gwestiynau gan aelodau ac yn dilyn hynny, gadawodd ef, ynghyd â Jason Jones, Pennaeth Adfywio a Peter Edwards, Rheolwr Prisio, y cyfarfod. Wedyn aeth y Pwyllgor ymlaen i ystyried y cais a 'alwyd i mewn' gan gofio'r tri opsiwn sydd ar gael o dan Erthygl 6.7 o Gyfansoddiad y Cyngor.

Ni chafodd cynnig i beidio â gwrthwynebu'r penderfyniad ei wneud.

PENDERFYNWYD y dylid cyfeirio'r penderfyniad yn ôl at y Bwrdd Gweithredol i'w ystyried ymhellach gan roi sylw penodol i Ddeddf Llesiant Cenedlaethau'r Dyfodol a'r goblygiadau ar gyfer Amlosgfa Llanelli.