Agenda a Chofnodion

Derbyniwyd ymddiheuriadau am absenoldeb gan Caryl Davies a’r Cynghorydd Gareth Thomas.

Roedd y Cynghorydd Betsan Jones wedi datgan buddiant personol a rhagfarnol yn eitem 4 ar yr agenda gan ei bod yn un o'r Cynghorwyr a oedd wedi gwneud cais am ollyngiad.

PENDERFYNWYD YN UNFRYDOL lofnodi bod cofnodion cyfarfod y Pwyllgor a gynhaliwyd ar 9 Medi 2024 yn gofnod cywir.

(NODER: Roedd y Cynghorydd Betsan Jones wedi datgan buddiant personol a rhagfarnol yn yr eitem hon a gadawodd y cyfarfod wrth i’r Pwyllgor ystyried yr eitem a phenderfynu yn ei chylch).

Bu'r Pwyllgor yn ystyried ceisiadau am ollyngiad gan 29 aelod o Gr?p Plaid Cymru ar y Cyngor Sir am roi gollyngiad o dan ddarpariaethau Rheoliadau Pwyllgorau Safonau (Caniatáu Gollyngiadau) (Cymru) 2001

Dywedwyd bod y cais yn ymwneud â busnes y Cyngor yngl?n â thlodi gwledig a'r strategaeth prawfesur gwledig, ac roedd gan bob Cynghorydd fuddiant personol a rhagfarnol mewn busnes o'r fath gan fod pob un ohonynt yn byw mewn wardiau gwledig neu led-wledig neu roedd ganddynt gysylltiadau personol agos yn byw mewn wardiau gwledig neu led-wledig ac roedd y strategaeth prawfesur gwledig yn effeithio arnynt.

Rhoddodd Rheolwr y Gwasanaethau Cyfreithiol wybod i'r Pwyllgor am y sail y cyflwynwyd y ceisiadau ac amlinellodd pa un o'r seiliau hynny oedd yn berthnasol fel rhan o'r ceisiadau.

Argymhellwyd, pe bai'r Pwyllgor yn caniatáu'r ceisiadau yna byddai awdurdod dirprwyedig yn cael ei roi i'r Swyddog Monitro a fyddai'n ei awdurdodi i roi gollyngiad i unrhyw Gynghorydd arall sydd â diddordeb mewn busnes o'r fath gan gynnwys Aelodau'r Cabinet a fyddai’n rhoi awdurdod iddynt arfer eu pwerau fel aelodau cabinet unigol.

 Yn dilyn trafodaeth

PENDERFYNWYD YN UNFRYDOL wneud y canlynol:

7.1 rhoi gollyngiad o dan Reoliadau 2 (c), (d), (e) ac (f) Rheoliadau Pwyllgorau Safonau (Caniatáu Gollyngiadau) (Cymru) 2001 i'r Cynghorwyr Karen Davies, Handel Davies, Ann Davies, Bryan Davies, Andrew Davies, Kim Broom, Llinos Davies, Arwel Davies, Alex Evans, Hazel Evans, Mansel Charles, Linda Evans, Tyssul Evans, Ken Howell, Meinir James, Carys Jones, Betsan Jones, Hefin Jones, Jean Lewis, Neil Lewis, Aled Vaughan Owen, Denise Owen, Dorian Phillips, Emlyn Schiavone, Russell Sparks, Dai Thomas, Gareth Thomas, Alun Lenny ac Elwyn Williams hyd at ddiwedd Mawrth 2025 i SIARAD, CYFLWYNO SYLWADAU YSGRIFENEDIG A PHLEIDLEISIO ar faterion yn ymwneud â thlodi gwledig a'r strategaeth prawfesur gwledig.

7.2 nid yw'r gollyngiad yn berthnasol ar unrhyw achlysur lle mae'r Cyngor neu unrhyw Bwyllgor yn trafod yn benodol unrhyw faterion sy'n effeithio'n uniongyrchol ar lesiant Cynghorwyr y manylir arnynt yn 7.1 uchod neu eu cysylltiadau personol agos .

7.3 rhoi awdurdod dirprwyedig i'r Swyddog Monitro i roi gollyngiad i unrhyw Gynghorydd arall sydd â diddordeb mewn busnes o'r fath, gan gynnwys aelodau'r Cabinet sy'n eu hawdurdodi i arfer eu pwerau fel aelodau cabinet unigol.

Nid oedd dim materion brys i'w trafod.