Agenda a Chofnodion

S/35215

Datblygiad preswyl i gynnwys 51 o breswylfeydd ynghyd â gwaith cysylltiedig, tir ger Clos y Benallt Fawr, Fforest, Abertawe, SA4 0TQ

Gwnaed cais i'r Pwyllgor gynnal ymweliad safle er mwyn cael golwg ar y mynediad o'r safle i Heol y Fforest.

Yn unol â phrotocol y Pwyllgor Cynllunio roedd y gwrthwynebwyr a oedd wedi gofyn am gael siarad ynghylch y cais hwn wedi dewis cyflwyno eu sylwadau yn y cyfarfod ar ôl yr ymweliad safle.

RHESWM: Er mwyn i'r Pwyllgor gael golwg ar y mynediad o'r safle i Heol y Fforest yn sgil pryderon a fynegwyd ynghylch diogelwch ffyrdd.

S/35962

Cadw'r llawr gwaelod fel bar caffi yn ystod y dydd gan ddefnyddio cefn y llawr gwaelod a'r llawr cyntaf fel clwb nos yn ystod y nos ynghyd ag ychwanegu grisiau sy'n ddihangfa dân yn y cefn, 56 Stryd Stepney, Llanelli, SA15 3TG

Yn dilyn sylw a wnaed gan yr Aelod lleol yn gwrthwynebu'r cais cynllunio, cynigiwyd bod y Pwyllgor yn ymweld â safle arfaethedig y clwb nos er mwyn cael gwell amcan o ran a fyddai effaith niweidiol bosibl ar eiddo cyfagos a'r ardal gyfagos yn ystod yr oriau gweithredu.

RHESWM: Galluogi'r Pwyllgor i gael golwg ar y safle er mwyn cael amcan o leoliad y clwb nos arfaethedig mewn perthynas ag eiddo cyfagos.

S/36429

Estyniad deulawr ar yr ochr ynghyd â phorth ceir ar lefel y ddaear, 36 Coedlan Parc y Strade, Llanelli, SA15 3EF.

Daeth sylw i law a wrthwynebai'r datblygiad arfaethedig, ac a ailbwysleisiai'r pwyntiau y manylwyd arnynt yn adroddiad y Pennaeth Cynllunio. Cynigiwyd bod y Pwyllgor yn cynnal ymweliad safle i ystyried materion sef a fyddai'r cymydog cyfagos yn colli golau ac a fyddai'r adeilad yn ormesol, ac a fyddai'r cais yn arwain at newid cymeriad o ran golwg Coedlan Parc y Strade.

Yn unol â phrotocol y Pwyllgor Cynllunio roedd y gwrthwynebwyr a oedd wedi gofyn am gael siarad ynghylch yr eitem hon wedi dewis cyflwyno eu sylwadau yn y cyfarfod ar ôl yr ymweliad â'r safle.

RHESWM: Asesu a allai'r cynnig gael effaith niweidiol ar amwynder yr eiddo cyfagos o ran colli golau ac ystyried cymeriad y cynnig mewn perthynas â'r ardal.

S/35028

Preswylfa ddeulawr, 15A Bryncaerau, Trimsaran, Cydweli, SA17 4DW.

Roedd sylwadau wedi dod i law mewn perthynas â'r datblygiad arfaethedig yr oedd swyddogion wedi argymell ei fod yn cael ei wrthod.

Cafwyd sylw gan yr aelod lleol ar ran yr ymgeisydd. Ymatebodd yr Uwch-swyddog Rheoli Datblygu [Rhanbarth y De] i'r pwyntiau a godwyd.

Yng ngoleuni'r sylwadau uchod, cynigiwyd bod y Pwyllgor yn cynnal ymweliad safle er mwyn cael golwg ar y safle a'i fynediad yn sgil y pryderon a fynegwyd ynghylch diogelwch ffyrdd.

RHESWM: Er mwyn rhoi cyfle i'r Pwyllgor gael golwg ar fynediad y datblygiad arfaethedig.