Agenda a Chofnodion

Cafwyd ymddiheuriad am absenoldeb oddi wrth y Cynghorydd T.J. Jones.

Ni chafwyd dim datganiadau o fuddiant personol.

PENDERFYNWYD llofnodi cofnodion cyfarfod Pwyllgor y Gwasanaethau Democrataidd oedd wedi ei gynnal ar 14eg Mawrth 2017 gan eu bod yn gywir.

Bu'r Pwyllgor yn ystyried adroddiad a oedd yn amlinellu'r fframwaith statudol y mae Pwyllgor y Gwasanaethau Democrataidd yn gweithredu ynddo, ynghyd â'i faes gorchwyl a'i bwerau fel y nodir ym Mesur Llywodraeth Leol (Cymru) 2011, Deddf Llywodraeth Leol (Democratiaeth) (Cymru) 2013 a chyfrifoldebau ychwanegol a gafodd eu cymeradwyo gan y Cyngor ar 17eg Ebrill 2013.

PENDERFYNWYD nodi darpariaethau Mesur Llywodraeth Leol (Cymru) 2011 a'r Canllawiau Statudol sy'n ymwneud â Swyddogaeth Pwyllgor y Gwasanaethau Democrataidd.

 Ystyriodd y Pwyllgor adroddiad oedd yn manylu ar yr angen i benodi Hyrwyddwr Datblygu Aelodau a chadarnhau ymrwymiad yr Awdurdod i ddatblygu Aelodau. Byddai'r Hyrwyddwr Datblygu Aelodau yn gweithio'n agos gyda'r Arweinydd Datblygu Aelodau ar ran y Bwrdd Gweithredol a swyddogion y Tîm Dysgu a Datblygu er mwyn nodi a hybu materion sy'n ymwneud â datblygu Aelodau.

Awgrymwyd y dylai Cadeirydd Pwyllgor y Gwasanaethau Democrataidd ymgymryd hefyd â swyddogaeth yr Hyrwyddwr Datblygu Aelodau.

PENDERFYNWYD ARGYMELL I'R CYNGOR y dylid ymgorffori rôl Hyrwyddwr Datblygu Aelodau'r Cyngor i swyddogaethau Cadeirydd Pwyllgor y Gwasanaethau Democrataidd.

Ystyriodd y Pwyllgor adroddiad oedd yn manylu ar ganlyniadau cychwynnol arolwg ynghylch amseriad cyfarfodydd, y bu'n rhaid i'r Cyngor ymgymryd ag ef yn unol â Mesur Llywodraeth Leol (Cymru) 2011. Nododd y canlyniadau y byddai'n well gan y mwyafrif o'r aelodau gadw'r trefniadau sy'n bodoli ar hyn o bryd.

Ystyriwyd adroddiad ar y canfyddiadau gan Weithgor Adolygu'r Cyfansoddiad a oedd wedi gofyn am ddadansoddiad pellach o'r ymatebion i ganfod proffil oedran yr aelodau hynny oedd yn ffafrio cyfarfodydd gyda'r nos, a pha Bwyllgorau maent yn eistedd arnynt. Roedd y Gweithgor wedi argymell hefyd y dylid ystyried y posibilrwydd o gynnal sesiwn datblygu Aelodau gyda'r nos.

PENDERFYNWYD

6.1 cyflwyno adroddiad pellach ynghylch amseriadau cyfarfodydd i'r cyfarfod nesaf;

6.2  ystyried y posibilrwydd o gynnal sesiwn datblygu Aelodau gyda'r nos.

Bu'r Pwyllgor yn ystyried Adroddiad Blynyddol y Gwasanaethau Democrataidd ar gyfer y cyfnod 18^fed Mai 2016 – 24^ain Mai 2017. Roedd yr adroddiad yn amlinellu gwaith y Pwyllgor yn ystod y cyfnod hwnnw.

PENDERFYNWYD derbyn yr adroddiad.

Gan gyfeirio at gofnod 4 y cyfarfod oedd wedi ei gynnal ar 1^af Medi 2016, cafodd y Pwyllgor adroddiad cynnydd ynghylch Rhaglen Sefydlu'r Aelodau 2017a gwahoddwyd y Pwyllgor i roi sylwadau arno. Er mwyn sicrhau bod y Rhaglen wedi bod yn effeithiol wrth ddarparu gwybodaeth a dealltwriaeth ddigonol i'r Aelodau, gofynnwyd am adborth hefyd gan Aelodau ynghylch cynnig i gynnal grwpiau ffocws.

Dywedwyd bod un neu ddwy sesiwn wedi cyd-daro â chyfarfodydd pwyllgorau, yn anffodus, ac y byddai rhai sesiynau wedi bod ar eu hennill o gael eu cynnal dros ddau ddiwrnod. Dywedodd Swyddogion y byddai gwybodaeth am yr holl sesiynau ar gael ar-lein ar gyfer Aelodau nad oeddent wedi gallu bod yn bresennol. Mynegwyd pryder ynghylch y niferoedd bychain oedd yn bresennol mewn rhai sesiynau, yn arbennig o gofio faint o waith paratoi a wnaed gan swyddogion, ond derbyniwyd nad oedd hi'n ofynnol yn gyfreithiol i fynychu. Awgrymodd y Cadeirydd y gallai hyn fod yn fater i Gymdeithas Llywodraeth Leol Cymru ei ystyried.

PENDERFYNWYD

8.1  derbyn yr adroddiad;

8.2 edrych ymhellach ar y posibilrwydd o aildrefnu'r daith ymgynefino â gogledd a gorllewin y Sir ar gyfer yr Aelodau sydd newydd gael eu hethol;

8.3. croesawu'r cynnig i gynnal grwpiau ffocws.

Bu'r Pwyllgor yn ystyried blaenraglen waith ar gyfer 2017/18 a oedd yn rhoi Eitemau Agenda i'r Aelodau ar gyfer Cylch 2017/18 y Pwyllgor Democrataidd.

Awgrymodd y Cadeirydd y gallai'r flaenraglen waith hefyd gynnwys eitemau ar ddarpariaeth TG yr Aelodau ac adolygiadau/ gwaith mentora ar ddatblygiad personol.

PENDERFYNWYD mabwysiadu'r Flaenraglen Waith yn amodol ar gynnwys yr awgrymiadau uchod.